Utforske nærmiljøet
Temaet handlar om å gi elevane moglegheiter til å utforske korleis dei kan røre seg i og bruke nærmiljøet sitt.
Forankring i læreplanverket
Verdigrunnlaget i overordna del:
- Skaparglede, engasjement og utforskartrong
Kjerneelement:
- Uteaktivitetar og naturferdsel
Kompetansemål etter 2. trinn:
- Utforske naturen i nærmiljøet med varierte aktivitetar til ulike årstider
Undervisningsaktivitetar
Utforsking skjer når elevane får tid og rom til å leike med naturmateriale og landskap. Element som vatn, stein, snø, stokkar og bakkar inviterer til eksperimentering, rørsle og sanseerfaringar.
Døme på kva elevane kan utforske i nærmiljøet:
Det er ofte nok å konsentrere seg om eitt område eller eitt element om gongen – til dømes ein søledam eller eit lite skogholt. Tid til gjentaking og fordjuping er viktig for at barna skal utvikle tryggleik i utforskinga.
Korleis støtte utforsking?
Som lærar kan du støtte elevane si utforsking ved å:
- Stille opne spørsmål (sjå døme nedanfor)
- Delta i leiken, vise undring og modellere nysgjerrigheit
- Tilby enkle reiskapar som forstørringsglas, bøtter og spadar
Gi elevane høve til å kjenne på og vurdere risiko – som å balansere på steinar, klatre i tre eller røre seg på glatte underlag. Slike erfaringar er viktige for å utvikle trygg og sjølvstendig ferdsel i naturen.
Når barn leikar og eksperimenterer i naturen, lærer dei gjennom kroppen. Over tid utviklar dei forståing for materiale og omgjevnader – og for seg sjølve: Kva får eg til her? Kva tør eg å prøve? Korleis kan eg røre meg i naturen på nye måta?
Refleksjon med elevane
Still opne spørsmål knytt til kva og korleis elevane har utforska i undervisninga:
- Kva ville du finne ut eller teste? Korleis gjekk du fram?
- Kva la du merke til? Prøvde du fleire gongar? Kva skjedde då?
- Kva nytta du for å utforske – auge, øyre, hendene? Andre ting?
- Kva oppdaga du?
- Finst det andre måtar å gjere det på?
Du kan òg stille spørsmål som hjelper elevane å sjå samanhengar:
- Korleis kan du utforske på liknande måte ein anna stad?
- Kan du bruke det du lærte i ein anna situasjon eller i eit anna fag?
- Kva veit du no som du ikkje visste før?